London ( Sh. M. Network )-Wargeyska The Guardian ee ka soo baxa dalka Britain ayaa warbixin dheer ka qoray qaraxii maalintii Sabtida ahayd ka dhacay Magaalada Muqdisho, kaasi oo ay ku Naf waayeen in ka badan 300 ruux oo ku sugnaa Isgoyska Zoobe ee degmada Hodan.

Wargeyska oo soo xiganayo Saraakiil ayaa sheegay in ruuxa Naftii huraha ahaa uu ka tirsanaan jiray ciidanka dowladda Federaalka Soomaaliya, deegaan ahaana uu ka soo jeeday deegaanka Bariire oo bishii hore ciidanka dowladda iyo kuwa Mareykanka howlgal ay ka fuliyeen ku dileen 10 ruux oo shacab ahaa.

Waxa uu sidoo kale intaasi ku daray in qaraxa uu ahaa mid loogu aargudayay dadkii ku geeriyooday weerarkii Bariire ee Mareykanka uu qeybta ka ahaa.

Gaadiidka qaraxyada loo qorsheeyay in lagu fuliyo ayaa ka koobnaa 2 gaari sida ay xaqiijiyeen Saraakiil u warramay Wargeyska oo uu soo xigtay.

Kan koowaad ayaa ahaa gaari Noah, gaariga labaad waxa uu ahaa mid xamuul ah oo siday walxo qarxo lagu qiyaasay 350Kg.

Labada gaari ayaa u jeedkooda waxa uu ahaa in lagu weeraro garoonka diyaaradaha ee Aadan Cadde, halkaasi oo ay ka agdhow yihiin xarumaha hay’adaha QM, sidoo kalena fariisin u ah ciidanka AMISOM oo tiradooda ay gaarayso 22,000 oo Askari, sida ay xaqiijiyeen saraakiisha u warramay Wargeyska The Guardian.

Qaraxa koowaad ee gaariga Noah oo ay fashiliyeen ciidanka dowladda ayaa qorshihiisa ahaa in lagu weeraro Iridka Madiina Gate, si uu halkaasi ugu furo gaariga kale qaraxa ahaa oo doonayay in gudaha uu u gudbo.

Wargeyska ayaa xaqiijiyay in gaariga weyn ee ku qarxay Isgoyska Zoobe lagu celiyay dhowr Bar Control oo ay ku sugnaayeen ciidanka dowladda, balse aysan suurta galin in la xakameeyo oo uu ugu dambeyn ku qarxay Isgoyska Zoobe oo shacab fara badan ay ku waxyeeloobeen.

Saraakiisha ayaa sidoo kale tilmaamay in ninka waday gaariga Noah ah uu ku dhaawacmay hadda ka hor weerar ka dhacay Hotel Jasiira oo uusan shaacin xilliga uu ahaa.

Wargeyska The Guardian ayaa soo xiganayay laba sarkaal oo uusan magacooda shaacin.

Xigasho:-The Guardian