Afgooye ( Sh. M. Network )-Wararka laga helayo gobolka Shabeelaha Hoose ayaa sheegaya in diyaarad nuuca loo yaqaano Drones-ka ay ku soo dhacday nawaaxiga deegaanka Awdheegle ee gobolkaasi.

Al Shabaab oo gacanta ku haya halkaasi ayaa sheegay in ay qabteen burburka diyaaradaasi oo ku soo dhacday duleedka deegaankaasi Awdheegle.

Waxaana ay tilmaameen in ay ka furteen qalab u badan Kaamirooyin oo sida ay sheegeen aan waxba gaarin.

Labo maalin ka hor ayey ahayd, markii sidan oo kale diyaarad Drone ah ay ku soo dhacday deegaanka Beerxaani ee gobolka Jubbadda Hoose, taas oo burburkeeda ay gacanta ku dhigeen Al Shabaab.

Arrimahan ayaana ku soo aadaya, xilli muddooyinkii dambe diyaaradaha Mareykanka ay kordhiyeen duqeymaha ka dhanka ah Al Shabaab ee ay ka fuliyaan Soomaaliya.