Victoria ( Sh. M. Network )-Ciidamada booliska ee Dalka ayaa soo xiray Cali Khaliif Shire oo Asal ahaan ka soo jeeda Soomaaliya, kaas oo lagu eedeynayo in uu qorsheynayay weeraro Argagaxiso oo uu ka fuliyo Dalkaasi.

Ku xigeenka madaxa booliska Magaalada Victoria Shane Patton ayaa Wariyeyaasha u sheegay in Cali oo ah 20 jir uu doonayay in dhibaato ka dhan ah amniga ka fuliyo Dalka Australia.

Mr Patton ayaa intaasi ku daray in Ninkaasi uu ka dhashay Dalka Australia, balse waalidkiis ay ka yimaadeen Soomaaliya.

Cali Khaliif ayaa la filayaa in Bisha March ee Sanadka soo socda uu ka soo muuqdo maxkamad, iyadoo lagu eedeynayo in uu heystay Dukomentiyo muujinayo inuu qorshaynayay weeraro Argagixiso oo u ka geysto qeybo ka mid ah Australia.

Wasiirka Cadaalada ee Australia Michael Keenan ayaa sheegay in dowladiisa aysan bartilmaameed saneynin qolo ama kooxo gaar ah, laakiin ay sameyso baaritaan ku aadan kooxo lagu tuhmo in ay ku lug leeyihiin dhinaca Argagixisada.

Ciidamada amniga ee Dalkaasi ayaa hore gacan ugu dhigay 74 ruux oo looga shakiyay in ay ka tirsanaayeen Ururada Argagixisada.