Caabudwaaq ( Sh. M. Network):-Guddiga Guurtida Galmudug ayaa Awaamiir ka soo saaray xiisado ka taagnaa Waqooyiga Gobolka Galgaduud gaar ahaan degmada Caabudwaaq iyo deegaanada hoostaga.

Waxaana Guddigaasi Guuriga ay isku raaceen arrimo ku aadan dhinaca Ammaanka iyagoona soo saaray awaamiir ku qotoma  xasiloonida Magaalada Caabudwaaq ee Gobolka Galgaduud.

Awaamiirta ay soo saareen waxaa ka mid ah Guddigaasi in Ammaanka Magaalada Caabudwaaq si kooban loogu wareejiyo Ciidamo Isku dhaf ah  oo leh Talis Mideysan.

In Magaalada Laga saaro Ciidamada kale ee Hubeysan loona celiyo Saldhigyadoodii ka baxsanaa Magaalada Caabudwaaq.

In Magaalada Caabudwaaq ay tahay Goob ka caagan Hub Sharci darro ah oo aan ku jirin gacanta Ciidanka Loo Igmaday Xasilinta Magaalada Caabudwaaq.

In Ciidamada Xasilinta Caabudwaaq Amar buuxa loo siiyay in ay qabtaan qof kasta oo hubeysan oo aan ku jirin Ciidamada Xasilinta Magaalada Caabudwaaq.

Qodobadaasi iyo kuwa kale ayey soo saareen Guddiga Guurtida Galmudug ee ku aadanaa ammaanka Magaalada Caabudwaaq.

Madaxweynaha Soomaaliya Maxamed Cabdullaahi Maxamed Farmaajo oo booqashadiisii deegaanada Galmudug ku tagay degmada Caabudwaaq ayaa heshiis kala dhex dhigay Beelo Walaalo ah oo xurguf ay ku dhexmartay Magaaladaasi.