Dhoobley ( Sh. M. Network )-Wararka laga helayo Magaalada Dhoobley ayaa ku soo warramaya in Qarax Miino lagula eegtay Kolonyo Gaadiid ah oo ay la socdeen Ciidamo Kenyaan ah oo marayay inta u dhexeysa Maagalada Dhoobley iyo deegaanka Taabta ee Gobolka Jubbada Hoose.

Ma cadda Khasaraha Ciidamada Kenya  ka soo gaaray Qaraxaasi lala eegtay Kolonyada Gaadiidka ay la socdeen.

Wararka ayaa intaas ku daraya in Kolonyadani la weeraray ay siday Sahay Ciidan, islamarkaana ay ka ambabaxday degmada Dhoobley, kuna sii jeeday deegaanka Taabta ee Gobolka Jubbada Hoose.

Xarakada Al Shabaab oo sheegtay Masuuliyadda Qaraxaasi ayaa tilmaamay in tiro Ciidamo Kenyaan ah ay khasaarooyin dhimasho iyo dhaawac isugu jira kala kulmeen weerarkaasi, walow aysan cayimin.

Sidoo kale Al Shabaab ayaa  shaaca ka qaaday in Gaadiid dagaal ay ku gubeen Qaraxaasi, kuwaas oo ka mid ah Kolonyada la weeraray.

Inta badan Gobollada Jubbooyinka ayaa waxaa ka dhaca weeraro dhabo gal ah oo Al Shabaab ay kula beegsadaan halkaas Ciidamada AMISOM iyo kuwa Maamulka Jubbaland ee isaga kala goosha deegaanada  Gobolladaasi.