Nairobi ( Sh. M. Network )-Saraakiil ka tirsan Dowladda Kenya ayaa sheegay in ay dhaqan celinayaan illaa iyo 60 dhalinyaro ah oo ay sheegeen in ay ka soo goosteen Xarakada Al Shabaab ee ka dagaalanta dalalka Soomaliya iyo Kenya.

Dhalinyaradaasi ayey saraakiishu sheegeen in dhammaantood ay u dhasheen dalka Kenya, waxaana ay intaasi ku dareen in ay ku jiraan qaar ka tirsanaa Ardayda Jaamacadaha dalka kenya.

Sirdoonka Kenya ayaa sheegay in dhalinyaradaasi dib ugu soo laabtay dalkooda ay Dowladda ka caawin doonaan, sidii looga hortagi lahaa weerarada Al Shabaab ay ka geystaan gudaha dalkaasi.

Sarkaal ka tirsan sirdoonka Kenya ayaa sheegay in dhammaan dhalinyaradaasi isu soo dhiibay Dowladda loo diri doono baaritaan caafimaad ka hor inta aysan la kulmin Qoysaskooda.

Sanadihii 2016 iyo 2017 ayaa waxaa qaar ka mid ah Jaamacada Kenya ka tagay illaa 54 Ardey ah kuwaas oo ku biiray Xarakada Al Shabaab iyo Ururka Daacish ee dalalka Siiriya, Soomaaliya iyo Yemen

Kenya ayaa horay Al Shabaab ugu adeysay in ay toogteen dhalinyaro dhalasho ahaan ka soo jeeda dalkeeda, kana tirsanaa Al Shabaab, kuwaas oo lagu tuhmay in ay u basaasayeen ciidamada dalka Kenya.