Kampala (Sh M Network)—Taliska militariga ee Dalka Uganda, ayaa markale ku celiyay in ay diyaar u yihiin in kumanaan askari oo dheeraad ah ay soo diraan Dalka Soomaaliya.

Richard Karemire oo ah Afhayeenka Ciidamada Dalka Uganda, ayaa waxuu sheegay in Dowladda Uganda ay diyaar u tahay in 5 kun oo askari ay u soo daabusho Dalka Soomaaliya.

Waxaa uu intaasi ku daray in Ciidamadan ay ka qeyb qaadan doonaan Dagaalka ka dhanka ah Xarakada Al Shabaab, islamarkaana ay xoojinayaan howlgalka Midowga Afrika ee AMISOM.

Afhayeen Richard Karemire ayaa shaaciyay in Xukuumadda Kampala ay ka go’an tahay in marwaliba ay ka qeyb qaadato howlgallada lagu xasilinayo Soomaaliya.

Isagoo hadalkiisa sii wata ayaa Afhayeenka waxaa uu tilmaamay in Ciidamo kale oo dheeraad ah ay u soo diri doonaan hadii Beesha Caalamka ay bixiyaan dhaqaalaha loogu talagay howlgallada qeybta ka yihiin Ciidamada AMISOM.

Sikastaba, hadalka Taliska militariga ayaa waxuu imaanayaa xili Madaxweynaha Uganda uu u sheegay Mareykanka in uu diyaar u yahay in Ciidamo dheeraad ah uu diro Dalka Soomaaliya, si ay uga qeyb qaataan howlgallada ka dhanka ah Al Shabaab.