Cadaado (Sh M Network)—Xildhibaanada Baarlamaanka Maamulka Galmudug ayaa codka kalsoonida kala laabtay Gudoonka Baarlamaanka, Cali Gacal Casir iyo Madaxweyne Ku Xigeenka Maamulka Galmudug, Maxamed Xaashi Cabdi (Carabeey).

Kulanka Baarlamaanka uu shir guddoominayay Ku Xigeenka Guddoonka Baarlamaanka, Xareed Cali Xareed ayaa waxaa soo xaadiray 59 Xildhibaan oo ka mid ah Mudaneyaasha Baarlamaanka Maamulka Galmudug.

Mudane Cali Nuur oo ka mid Xildhibaanada Galmudug oo la hadlay Idaacadda Shabelle ayaa waxuu sheegay in 52 Xildhibaan ay u codeeyeen xil ka qaadista Guddoonka Baarlamaanka halka 57 Xildhibaanna ay codka kalsoonida kala laabteen Madaxweyne Ku Xigeenka Maamulka Galmudug, Maxamed Xaashi Cabdi (Carabeey).

Isagoo hadalkiisa sii wata ayaa Xildhibaan Cali Nuur waxuu tilmaamay in Mudaneyaasha Baarlamaanka Maamulka Galmudug ay codka kalsoonida kala laabteen labadan mas’uul kadib markii sida uu sheegay ay khilaafeen Madaxweynaha Maamulka Galmudug, Axmed Ducaalle Geelle Xaaf.

Dhinaca kale, Ku Xigeenka Guddoonka Baarlamaanka Maamulka Galmudug, Xareed Cali Xareed oo la hadlay Idaacadda Shabelle ayaa sharci ku tilmaamay xil ka qaadista lagu sameeyay labada mas’uul.

Sikastaba, khilaaf siyaasaadeed ayaa muddooyinkii dambe ka dhex aloosnaa Maamulka Galmudug, iyadoo xusid mudan in xalinta khilaafkaasi ay isku xilsaareen Xildhibaano ka tirsan Golaha Shacabka iyo kan Aqalka Sare.